14TH NATIONAL PARA JUDO CHAMPIONSHIP 2025

22nd December 2025

14th National Para Judo Championship 2025, Sri Ganganagar, Rajasthan a neih mek chu vawiin khan zawhfel a ni a, Mizoram Team chuan Gold 1, Silver 1 leh Bronze 1 an la a ni.

Gold Medal latu hi Shimon Chorei a ni a, a medal lakna hi Junior Category J1, Below 50Kg a ni. An weight ah hian mi 16 an awm a, a vaia bout vawi 4 khelin a tumpui te harsa lovin a hneh vek a ni.

Kolasib Hmarveng tlangval Victor Lalrindika chuan Junior Category, J2 Below 45Kg ah Silver a la ve bawk a, final ah hian tawnhriat ngah tak mai nena intumin vanduai zawk a ni ta hlauh mai a, final ah a chak zo ta lo a ni.

Vawiin a zawh ni ah 13th National Para Judo Championship hnuhnung bera a khelhna weight a hnehtu tawng lo West Serzawl tlangval David Lalremruata tuna Khelo India State Centre for Excellence (KISCE) Mualpui a zir mek chuan Senior Category J1 Below 81Kg ah khelin an weight ah mi 12 an awm a, a bye nghal a, a bout hmasa berah awlsam takin Tamil Nadu aiawh chu second 15 chhungin a hneh a, Semi Final a lut nghal. Amaherawhchu, uiawm takin semin final ah a chak zo ta lo a ni. Semi Final a a tumpui hi weight sang zawk below 95Kg gold medalist ni lai leh kum eng emaw ti chhunga hnehtu tawng lo niin India aiawh reng thin a ni a, point pangngai awm lova inhnehtawk viauin Madya Pradesh aiawhtu Divendra hian *Yuko* hmanga a point 2 lek hmuh hmangin huntawpah chak zawka puan a ni ta a ni. Davida tan a uiawm em em a, "Pathianin rem a tih chuan Kumthar lamah chak zawk leh hmasawn lehzual a a tel ve leh ngei tur thu a sawi a ni".

Mizoram Blind Judo Team ah hian Judoka mi pali (4) an kal a, pathumin medal la in 1 erawh medal hlawhchhuak zo lovin he Championship hi an khar a ni.

Mizoram Blind Sports Association chuan heng dinhmun tleng thei tura Malsawmna min petu Pathian chungah lawmthu a sawi a, tin, he championship khel thei tura financial assistance petu Mizoram State Sports Council leh Aizawl Smart City Limited te bakah Judo Coaching kan kalpui ve theihna tura min puitu Mizoram Judo Association leh Sports Department Hotute chungah lawmthu an sawi tak meuh meuh a ni.

Tin, hei aia chak leh awmze nei lehzual zawka Rualbanlo infiamna (Para/Disabled Sports) hi kalpui lehzual deuh deuh nizel thei se tih hi Rualbanlo Infiammi te duhthusam a ni.

He championship a Mizoram Blind Judo Team hi Manager - Pu R Lalramthanga, Kanan Veng, Aizawl niin Team Coach ah Pu Jerry Lalramenga, Durtlang te an ni.

Gold Medalist - Shimon Chorei