2026 IBSA JUDO GRAND PRIX KHEL TURIN DAVID LALREMRUATA

Dated Aizawl, 27th April 2026

Kum 2025 atanga Judo khel tan chauh West Serzawl tlangval David Lalremruata S/o Chingkhenpianga, pianphunga Rualbanlo (Persons with Disabilities) chuan a vawihnih na turin India aiawhin a fehchhuak dawn a, World Judo Championships 2025 a lo khelh tawhna Kazakhstan khawpui Astana ah bawk 2026 IBSA Judo Grand Prix khel tura thlan a ni leh a, May 8 - 14 2026 chhunga neih a ni ang..

David Lalremruata hi mitdel niin Mizoram atanga Rualbanlo infiamna lama achievement nei tha tak a ni a, National Championship ah Gold medal lo la tawh niin, World Championship hial a lo khel tawh a, tunah hian world ranking ah 17-na dinhmun luah mekin Asia ah chuan 5-na a ni. October a lo awm tur Asian Para Games, Japan a neih turah pawh a khelh theih ngei a beisei awm hle a, A khelh chhoh zel theih chuan 2028 Paralympics LA a tel ve theihna pawh a neisang hle nghe nghe a ni.

Vawiin April Ni 27 2026 hian Indian Para Judo Camp, Lucknow ah lutin pre departure camp an nei ang a, he hmun atang hian Astana lam an pan ang..

Mizoram State Sports Council Golden Jubilee lawmna April Ni 20 2026 a neih ah Sportsperson of the year among persons with disabilities a lo dawng tawh bawk a, tunah hian Khelo India Mizoram State Centre for Excellence (KISCE), Sports & Youth Services Department hnuaia Judo Training mek a ni.

Mizoram Blind Sports Association leh Mizoram Judo Association te chuan an judoka David Lalremruata hi hlawhtlinna chang ngei turin duhsakna an hlan a, Mizoram Sawrkar leh mipui te pawhin Disabled Sports/Para Sports lam ngaihven zui zel a, support pe theuh turin min ngen a ni.